Dünya “güc siyasətinə” qayıtdıqdan sonra Türkiyə, Azərbaycan və Pakistan yeni regional əməkdaşlıq oxu formalaşdırıblar. Bu alyansın əsas prinsipi “Üç dövlət, bir millət” ideyasıdır. Əsas məqsədləri isə xarici təhlükələri dəf etmək, suverenliyi qorumaq və qlobal qeyri-müəyyənlik şəraitində yeni güc mərkəzi yaradaraq xarici təhdidlərə qarşı möhkəm dayanmaqdan ibarətdir.
AZƏRTAC xəbər verir ki, bu fikirlər Türkiyənin ingilisdilli “Daily Sabah” qəzetində siyasi şərhçi Muhittin Atamanın məqaləsində yer alıb. Müəllif qeyd edir ki, dünyada cərəyan edən qeyri-müəyyən geosiyasi proseslər orta və kiçik dövlətləri fəallaşmağa məcbur edib. Onlar təhlükəsizliyin təmin olunması məqsədilə təşəbbüslər irəli sürür, regional birliklər yaradırlar ki, xaricdən gələ biləcək təhlükələrin qarşısını ala bilsinlər.
Onun fikrincə, müasir dövrdə nə ABŞ kimi hegemon dövlətlər, nə də BMT kimi beynəlxalq təşkilatlar regional və qlobal problemlərin həllini tapa bilirlər. Buna görə də, dövlətləri birləşdirə biləcək ümumi dəyərlər əsasında yeni platformaların yaradılması faydalı əməkdaşlığın əsasını qoyur.
Azərbaycan, Türkiyə və Pakistanı birləşdirən dəyərlər kifayət qədərdir. Adətən, dövlətlər iqtisadi maraqlar ətrafında birləşərək qarşılıqlı faydalı əməkdaşlıq qururlar. Lakin son illərdə təhlükəsizlik təhdidlərinin artması siyasi ittifaqların yaranmasına səbəb olub. Bu ittifaqlar böyük dövlətlərdən asılılıqdan xilas olaraq müstəqil inkişaf yolunu müəyyən etməyə çalışırlar.
Məqalədə vurğulanır ki, Azərbaycan, Türkiyə və Pakistan təhlükəsizliyin təmin olunması üçün yeni regional birlik yaradıblar. Ümumi dəyərlər ətrafında birləşən bu dövlətlərin əməkdaşlığı İkinci Qarabağ müharibəsindən sonra daha da dərinləşərək strateji tərəfdaşlıq səviyyəsinə yüksəlib. Azərbaycan, Türkiyə və Pakistan biri-birini tamamlayan dövlətlərdir. Azərbaycanın neft və qaz potensialı, Türkiyənin inkişaf etmiş hərbi sənayesi, Pakistanın isə nüvə silahına malik yeganə müsəlman dövləti olması bu əməkdaşlığı gücləndirən əsas amillərdəndir.
Müəllifin sözlərinə görə, üç dövlət təkcə təhlükəsizlik sahəsində deyil, həm də ticarət, enerji, nəqliyyat, elm, təhsil və mədəniyyət sahələrində əməkdaşlığı genişləndirməlidir. Misal üçün, Türkiyə və Azərbaycan Pakistanı Türk Dövlətlər Birliyinə dəvət edə bilərlər.
