Artıq üç gündür davam edən Bakı İqlim Fəaliyyəti Həftəsi (BCAW2025) kifayət qədər maraqlı və məhsuldar müzakirələrlə yadda qalır. Həftə ərzində ümumilikdə 46 sessiya nəzərdə tutulub.
AZƏRTAC xəbər verir ki, bu sözləri COP29 Prezidenti Muxtar Babayev Bakı İqlim Fəaliyyəti Həftəsi çərçivəsində keçirilən üçüncü günün yekun panelində deyib.
Muxtar Babayev qeyd edib ki, həftə çərçivəsində dövlət qurumları, özəl sektor və vətəndaş cəmiyyəti nümayəndələri bir araya gətirilib: “Məqsədimiz o idi ki, bu platforma açıq olsun, dialoq formasında keçsin. Həftə ərzində ümumilikdə 46 sessiya nəzərdə tutulub. Buraya panel müzakirələri, şəhərin müxtəlif mərkəzlərində keçirilən tədbirlər, dəyirmi masalar, gənclərin xüsusi proqramı daxildir”.
Muxtar Babayev qeyd edib ki, artıq üç gün ərzində iqlim dəyişiklikləri ilə mübarizə mövzusu müxtəlif sektorlarla geniş müzakirə olunub: “Biz həm yaşıl iqtisadiyyata keçid və yaşıl bacarıqlar, həm də enerji sektorunun bu istiqamətdəki fəaliyyəti barədə danışdıq. Bu gün isə dayanıqlı kənd təsərrüfatı, nəqliyyat, rəqəmsallaşma və qadınların rolu mövzularını müzakirə edirik. İqlim dəyişmələrinin təsirini qadınlar daha çox hiss edirlər və bunu statistika da təsdiqləyir”.
Muxtar Babayev vurğulayıb ki, heç bir mövzu diqqətdən kənarda qalmır və hər sahə üzrə dərin müzakirələr aparılır: “Dəyirmi masalarda dövlət qurumları ilə özəl sektorun nümayəndələri bir araya gətirilir, çağırışlar və imkanlar müzakirə olunur. Biz açıq platforma formalaşdırırıq ki, maraqlı tərəflər bir araya gəlib yaşıl iqtisadiyyata keçid mövzusunda dialoq aparsınlar”.
COP29 Prezidenti özəl sektorun rolunu xüsusi qeyd edərək deyib: “Çünki məhz özəl sektor texnologiyalarla, innovativ həll yolları ilə çıxış edir. Onlar üçün uyğun ekosistem yaradılmalıdır. Biz süni intellektin həyatımızın bütün sahələrinə təsir etdiyi bir dövrdə yaşayırıq. Bu şəraitdə iqlim dəyişmələri kontekstində texnologiyalardan necə istifadə edəcəyimiz əsas müzakirə mövzusudur”.
Muxtar Babayev əlavə edib ki, tədbir çərçivəsində bəyanatların imzalanması, tərəfdaşlıqların qurulması və gələcək əməkdaşlıqlar xüsusi əhəmiyyət daşıyır.
jpg_1763916860.jpg)
jpg_1763620972.jpg)
