Çin Kommunist Partiyasının Mərkəzi Komitəsinin sabiq baş katibi, Çin Xalq Respublikasının (ÇXR) sabiq Sədru Cian Ceminin vəfatı ilə əlaqədar ölkədə dövlət bayraqları endirilib.

AZƏRTAC xəbər verir ki, bu barədə Cian Ceminin dəfni ilə əlaqədar yaradılmış komissiyanın açıqlamasında bildirilir. ÇXR Sədri Si Cinpinin rəhbəri olduğu komissiya qərara alıb ki, sabiq liderin ruhuna ehtiram əlaməti olaraq dekabrın 1-də Çinin dövlət qurumlarının binalarının və Pekindəki “Xalqın böyük sarayı”nın üzərindəki, habelə paytaxtın Tienanmen meydanındakı bayraqlar, ölkənin xaricdəki diplomatik nümayəndəliklərinin üzərindəki bayraqlar yarıyadək endirilsin. Çinin xaricdəki diplomatik nümayəndəliklərində matəm zalının təşkil olunması və arzu edənlərin başsağlığı verə bilməsinə imkan yaradılması qərara alınıb.

Komissiya Çinin təcrübəsini əsas götürərək, Cian Ceminin dəfn mərasiminə xaricdən qonaqların dəvət olunmayacağını açıqlayıb.

Qeyd edək ki, Çin Kommunist Partiyasının Mərkəzi Komitəsinin sabiq baş katibi, Çin Xalq Respublikasının sabiq Sədri Cian Cemin noyabrın 30-da 96 yaşında Şanxayda vəfat edib. Həkimlər sabiq liderin ölümünə leykoz xəstəliyinin və bir çox orqan çatışmazlığının səbəb olduğunu bildiriblər.

Cian Cemin Çin Kommunist Partiyası Mərkəzi Komitəsinin baş katibi (1989-2002-ci illər), paralel olaraq Çin Xalq Respublikasının sədri (1993-2003-cü illər) vəzifələrini icra edib. Onun hakimiyyəti illəri Çinin iqtisadi yüksəliş dövrünə təsadüf edir. Bundan başqa, Cian Ceminin hakimiyyəti illərində Honkonq və Makao Çinə qaytarılıb, ölkə Dünya Ticarət Təşkilatına üzv olub.