Müharibə başa çatsa da, qələbə əzmi ilə döyüşən ordumuzun Ali Baş Komandanı İlham Əliyev başda olmaqla, sıravi əsgərimizədək hər kəsin 44 gün ərzində göstərdiyi vətənpərvərlik dillərdə dastana çevrilib. Müharibə yalnız qələbə ilə tarixə yazılmadı, həm də xalqımızın o qanlı-qadalı günlərdə milli birliyini dünyaya nümayiş etdirdi. Ön cəbhədə döyüşən oğulların arxada gözləri qalmasın deyə, hamı səfərbər oldu. Kimin gücü nəyə çatırdısa, ordumuza, ön cəbhədəki igidlərimizə maddi və mənəvi dəstək olurdu.

Həmin günlərdə bir qrup qadın bir araya gələrək, həmrəylik nümunəsi göstərdilər: bişirdikləri isti xörək və şirniyyatı ön cəbhəyə, həm də hospitallardakı yaralı qazilərimizə yolladılar. Həmin qadınlardan biri də Sumqayıtda yaşayan Güllü Muraddır. Deyir ki, bizim komandamızın müharibə başlayandan hər şənbə-bazar günləri cəbhə bölgəsinə isti xörək və şirniyyat bişirib yollaması adi hala çevrilmişdi: “...Aramızda ön cəbhədə döyüşən oğulların anaları da var, dədə-baba torpaqları işğalda qalanlar da. Biz, bu işlə məşğul olan qadınlar, əslində, o günlərədək bir-birimizi yaxından tanımırdıq. Müharibə həm də bizi, arxada xalqımızı birləşdirdi. Bu birlik bizə düşmən üzərində qələbə  qazandırdı. Müharibəni zəfərlə başa çatdıran igidlərimiz gördülər ki, dövlətimizlə xalqımız ön cəbhədə döyüşənləri hər cür qayğıyla əhatə etdilər. Bu,  onlarda əhvali-ruhiyyəni artırdı. Ermənilərin fərariliyinin də şahidi olduq. Şəhidlərimizə Allah rəhmət eləsin. Qazilərimizə şəfa  diləyə-diləyə biz qadınlar da onlara kömək etmək üçün bacardığımızı əsirgəmədik.

Müharibə bitdi, ordumuz qələbə çaldı. Lakin bizim qrupda birləşən qadınlarımız  bu xeyirxahlıq ənənəsini dayandırmadılar. Həftəarası xəstəxanalardakı yaralı əsgərlərimizə də sovqatımızı əsirgəmirik. Demirdik ki, onların buna ehtiyacı var, ya yox. Onların səmimi, isti, ana-bacı sevgisi ilə əhatə olunmasına çalışırıq. Bu xidmətimizi dayandırmırıq. Əsgərlərimiz bilsinlər ki, bu, onlara yardım deyil, ana-bacı qayğısıdır...”

Qrupda Gültəkin Sadıqova, Samirə Mahmudova, əsgər analarından Mətanət Quliyeva, doğma yurdu Zəngilanı azad edilən Diləfruz Xəlilova, Sara Əkbər, Könül, Ziba, Hüsniyyə, Aytən, Sevinc Musəvi,  Fəridə, Nazlı, Nəzakət Cəfərova, Şahanə, Dildar Hazıyeva,  şəhid qızı Sima Qəhrəmanlı və s. kimi xanımlarımız, qızlarımız var ki, müxtəlif rayonlardan gələrək bir ailə kimi birləşib bu təşəbbüslə xidmət göstərirlər.

Evlərində çalışan və “İnstaqram” üzərindən bir qrupda birləşərək, sovqatlarını davam etdirən  xanımlar, əllərinizə, könlünüzə sağlıq! Əsgərə sovqat göndərən xanımlar, bu qələbədə, şəksiz ki, sizin də payınız var. Çünki deviziniz belə olub: “Hər şey Vətən üçün, hər şey Qələbə üçün!”

M.NƏRİMANOĞLU,

“Azərbaycan”