Çinin Geologiya və Geofizika İnstitutunun alimləri “Chang'e-5” adlanan pilotsuz kosmik cihazın Aya  eniş nöqtəsində əldə edilmiş fotoları və məlumatları analiz ediblər.

Cihazın eniş nöqtəsindən əldə etdiyi  Ayın qırıntılardan ibarət ən üst qatı olan reqolitin tərkibində 1 ton torpaq və süxurun payına düşən 120-180 qram su mövcuddur. Bu Yer kürəsində olan göstəricidən daha aşağıdır. Tədqiqat çərçivəsində alimlər təkcə fotoları deyil, həmçinin aparatın konstruksiyasında olan spektrometr vasitəsilə reqolitin və süxurun spektral əks etdirmə özəlliyinin məlumatlarını da analiz ediblər.

Nümunədə mövcud olan su səviyyəsini molekulların işığı necə udduqları əsasında təyin etmək mümkündür. Lakin bu üsul o qədər də dəqiq nəticə vermir. Belə ki, Ay səthindən ifraz olunan istilik əldə edilən məlumatlara təsir göstərir. Çinli alimlər bu təsiri istilik korreksiya modelinin istifadəsi vasitəsilə kompensasiya ediblər. Əldə edilmiş məlumatlar Ay torpağında 120 qram, yüngül qabarıq süxurda isə 180 qram suyun olduğunu göstərib. Tədqiqatçıların fikirlərinə əsasən, buradakı suyun əsas mənbəyi Günəş küləyidir.

Süxurun tərkibində olan yüksəksəviyyəli rütubət Ay səthinin altında yerləşən naməlum mənbə ilə əlaqələndirilir. Qeyd etmək lazımdır ki, “Chang'e-5” missiyası 2020-ci ildə başa çatıb. Missiyanın sonunda kosmik cihaz 1731 qram Ay süxuru  götürərək onu Yer kürəsinə uğurla çatdırıb. Ayda suyun mövcud olması üzrə sübutlar daha əvvəllər də mövcud olub. Lakin onlar Ay süxurlarının araşdırılması və orbital aparatların müşahidələri vasitəsilə əldə edilmişdi.