"Təmizliyinə və yüksək keyfiyyətinə görə halal məhsulların dünyada əhəmiyyəti getdikcə artır. Bu sektorun məhsullarına təkcə müsəlmanlar deyil, digər istehlakçı qrupları da üstünlük verirlər". 
Bunu Türkiyə Prezidenti Rəcəb Tayyib Ərdoğan İstanbulda keçirilən VIII Dünya Halal Məhsul Sammiti və İslam Əməkdaşlıq Təşkilatının (İƏT) IX "Halal Expo" Sərgisinin iştirakçılarına müraciətində deyib.
Dövlət başçısı qeyd edib ki, tədbirin keçirilməsində məqsəd Türkiyəni qlobal halal qida iqtisadiyyatının mərkəzlərindən birinə çevirmək, halal məhsul ticarətini  inkişaf etdirmək və satış bazarlarını genişləndirməkdir.
"Qlobal halal məhsul iqtisadiyyatının bütün maraqlı tərəflərini bir araya gətirəcək VIII Ümumdünya Halal Sammitinin və İƏT-in IX "Halal Expo" Sərgisinin təşkilində əməyi olan hər kəsi təbrik edir, bütün iştirakçıları səmimi-qəlbdən salamlayıram", - deyə Rəcəb Tayyib Ərdoğan bildirib.
Tədbir İslam Ticarətinin İnkişafı Mərkəzi (ICDT) və İslam Ölkələrinin Standartlar və Metrologiya İnstitutu (SMIIC) ilə əməkdaşlıq çərçivəsində təşkil olunub. Sərgilərin qlobal media tərəfdaşı "Anadolu" Agentliyidir.
Tədbirin təşkilatçılarının məqsədi qlobal halal məhsul iqtisadiyyatının maraqlı tərəfləri ilə görüş üçün platforma yaratmaq, həmçinin halal məhsullar üzrə qlobal bazarda Türkiyənin payını artırmaqdır.
Hər iki toplantı Türkiyə Prezidentinin Administrasiyasının himayəsi və Türkiyənin xəzinə və maliyyə naziri Nurəddin Nəbatinin iştirakı ilə İstanbul Sərgi Mərkəzində keçirilir.
Bu il sərginin mövzusu "Davamlı ticarət naminə: qlobal halal məhsul sənayesinin inkişafının aspektlərini üzə çıxarmaq"dır.
Tədbirlərdə 40 ölkənin 500-dək şirkəti təmsil olunur. Qeyd edək ki, "Halal Expo" Sərgisinə hər il 40 minə yaxın insan gəlir. Hazrda dünyada halal məhsul bazarının ümumi həcmi 7 trilyon dollara bərabərdir. Türkiyənin payı 150 milyard dollar təşkil edir.  Ankaranın məqsədi növbəti 5 il ərzində  dünya halal məhsul bazarında öz payını 400 milyard dollara çatdırmaqdır.

R. HİLALOĞLU,
"Azərbaycan"