26 Oktyabr 2020 21:27
463
SİYASƏT
A- A+

Azərbaycan və Latviya XİN-ləri arasında məsləhətləşmələr keçirilib


Oktyabrın 26-da Azərbaycan Respublikası Xarici İşlər Nazirliyi və Latviya Respublikasının Xarici İşlər Nazirliyi arasında videokonfrans formatında siyasi məsləhətləşmələr keçirilib.

Xarici İşlər Nazirliyinin Mətbuat xidməti idarəsindən AZƏRTAC-a bildiriblər ki, nümayəndə heyətlərinə Azərbaycan tərəfdən Xarici İşlər nazirinin müavini Xələf Xələfov, Latviya tərəfdən isə bu ölkənin Xarici İşlər Nazirliyinin dövlət katibinin müavini, siyasi direktoru Yaniş Mazeiks rəhbərlik ediblər.

Məsləhətləşmələr zamanı ölkələrimiz arasında əlaqələrin hazırkı vəziyyəti təhlil olunub, əməkdaşlığın perspektivləri barədə fikir mübadiləsi aparılıb. Tərəflər Azərbaycan və Latviya arasında siyasi dialoqun yüksək səviyyədə olmasından məmnunluqlarını ifadə ediblər. Bu xüsusda, Azərbaycan ilə Latviya arasında 2017-ci ildə imzalanmış Strateji Tərəfdaşlığın Yaradılması haqqında Bəyannamə xüsusi əhəmiyyətli hadisə kimi dəyərləndirilib.

Tədbirdə ikitərəfli iqtisadi əməkdaşlığın geniş potensiala malik olduğu qeyd edilib, iqtisadi-ticari, elmi-texniki və mədəni sahələrdə əlaqələrin təşviqinə dair məsələlərin müzakirəsi və həlli məqsədilə Hökumətlərarası Komissiyanın növbəti - 8-ci iclasının 2021-ci ildə keçirilməsinin mümkünlüyünə inam ifadə olunub.

Həmçinin mədəniyyət, elm və təhsil sahələrində əlaqələr müzakirə edilib, hər il çox sayda azərbaycanlı gəncin Latviya universitetlərində təhsil almasından məmnunluq bildirilib.

Görüşdə, eyni zamanda, Ermənistan-Azərbaycan Dağlıq Qarabağ münaqişəsi ətrafında fikir mübadiləsi aparılıb. Münaqişənin sülh yolu ilə həlli üçün BMT Təhlükəsizlik Şurasının müvafiq qətnamələrinin yerinə yetirilməsinə diqqət çəkilib. X.Xələfov Azərbaycanın ərazi bütövlüyünü və suverenliyini dəstəklədiyinə görə Latviya tərəfinə təşəkkürünü bildirib.

Nazir müavini Latviya tərəfinə Ermənistanın Azərbaycana qarşı təcavüzkar siyasəti, o cümlədən iyulun 12-16-da Azərbaycan–Ermənistan dövlət sərhədində həyata keçirdiyi hərbi təxribatı və sentyabrın 27-də ölkəmizə qarşı növbəti hərbi təcavüz aktı barədə məlumat verib. X.Xələfov Ermənistan silahlı qüvvələrinin humanitar atəşkəsi pozmaqda davam etdiyini, münaqişə zonasından uzaqda yerləşən Azərbaycan şəhərlərinin, dinc əhalinin, mülki infrastrukturun məqsədyönlü şəkildə raket atəşinə tutduğunu, sentyabrın 27-dən etibarən ölkəmizə qarşı yeni hərbi təxribatları nəticəsində 65 mülki şəxsin həyatını itirdiyi və 300-ə yaxın dinc sakinin yaralandığını həmsöhbətinin diqqətinə çatdırıb.

Nazir müavini bildirib ki, Azərbaycan beynəlxalq səviyyədə tanınmış sərhədləri çərçivəsində özünümüdafiə hüququna əsaslanaraq, Ermənistan tərəfindən işğal edilmiş ərazilərinin azad olunması üçün hərbi-siyasi tədbirləri davam etdirir. Ermənistanın işğalçı qüvvələrinin Azərbaycan ərazilərində Silahlı Qüvvələrimizə qarşı müharibə aparmasına görə tam məsuliyyətin Ermənistanın hərbi-siyasi rəhbərliyinin üzərinə düşdüyü qeyd olunub. Vurğulanıb ki, Ermənistan silahlı qüvvələri Azərbaycan ərazilərini tam tərk etməyənədək bölgədə dayanıqlı sülh təmin oluna bilməz.

Tərəflər, həmçinin qarşılıqlı maraq doğuran digər regional və beynəlxalq məsələlər ətrafında fikir mübadiləsi aparıblar.

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

DİQQƏT ÇƏKƏNLƏR

ÇOX OXUNANLAR

OXUCU MƏKTUBLARI

NƏŞRLƏRİMİZ

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

TƏQVİM / ARXİV

Video