Son illər Prezident İlham Əliyevin rəhbərliyi altında bütün sahələrlə yanaşı, yol infrastrukturunun yenilənməsi istiqamətində də məqsədyönlü tədbirlər həyata keçirilir. Dövlət başçısının respublika və yerli əhəmiyyətli yolların yenidən qurulması, ən ucqar dağ kəndlərinə belə yeni yolların çəkilməsi ilə bağlı imzaladığı çoxsaylı sərəncamlar Qazaxda da uğurla icra olunur.

Rayonun kəndlərində çəkilən Qazaxbəyli-Orta Salahlı-Aşağı Salahlı, Yuxarı Salahlı-Kəmərli, Kosalar, Quşçu Ayrım, Canalı, Çaylı, Bala Çaylı, Hüseynbəyli, Cəfərli, Daş Salahlı-Ürkməzli-Dəmirçilər yeni asfalt yolları bu sahədə görülən işlərin bariz nümunəsidir.

Düşmənlə sərhəddə yerləşən Fərəhli kəndinə yeni asfalt yolun çəkilməsinə başlanması isə bu işlərin məntiqi davamıdır. Uzun illər istifadə olunduğundan yararsız vəziyyətə düşmüş yolun əsaslı şəkildə təmiri üçün kənd sakinlərinin Qazax Rayon İcra Hakimiyyətinə müraciəti nəticəsində həmin yolun dəfələrlə qum-çınqıl tökülərək cari təmir olunması problemi həll etməmişdi. Bu vacib məsələ Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidovun Fərəhli kəndində seçicilərlə keçirdiyi görüşdə də sakinlər tərəfindən qaldırılmış və xahiş olunmuşdu ki, bu işdə onlara kömək göstərilsin.

Artıq bir neçə gündür ki, Prezidentin sərəncamı ilə düşmənlə üz-üzə dayanmış Fərəhli kəndinə yeni asfalt yol çəkilir. Yolun çəkilişinə başlanması ilə əlaqədar keçirilən tədbirdə kənd sakinlərindən şəhid atası Qurban Orucov, Ramin Həsənov, Fariz Məmmədov, Balaqız Daşdəmirova, Sakit Daşdəmirov çıxış edərək dövlət başçısına minnətdarlıqlarını bildirmişlər.

S.ƏLİYEV,

"Azərbaycan”