11 Avqust 2020 00:23
837
DÜNYA
A- A+

Lukaşenko təbrikləri qəbul edir


Belarusda prezident seçkiləri hakimiyyət dəyişikliyi ilə nəticələnmədi


Belarusda srağagün keçirilmiş növbəti prezident seçkiləri, bir sıra müşahidəçilərin proqnozlarının əksinə olaraq, yeni dövlət başçısının adının elan olunması ilə yadda qalmadı. 1994-cü ildən bəri ölkəyə rəhbərlik edən Aleksandr Lukaşenko bir daha rəqiblərindən üstün olduğunu nümayiş etdirdi və Prezident kürsüsünü qoruyub saxladı.

Mərkəzi Seçki Komissiyasının (MSK) dünən açıqladığı ilkin rəsmi məlumata görə, Lukaşenko seçici səslərinin 80,08 faizini toplayaraq inamlı qələbə qazanmışdır. Hazırkı dövlət başçısının əsas rəqibi - həbsdə olan bloger Sergey Tixanovskinin (o, həbsdən qabaq prezidentliyə namizədliyini irəli sürmək fikrində idi) həyat yoldaşı Svetlana Tixanovskaya seçicilərin vur-tut 10,09 faizinin dəstəyinə nail olmuşdur. Prezidentliyə digər üç namizədin hər biri 2 faizdən az səs toplamışdır. Seçicilərin 4,6 faizi bütün namizədlərin əleyhinə səs vermişdir. Seçkilərdə fəallıq yüksək olmuşdur: səs vermək hüququ olan vətəndaşların 84,23 faizi bu hüquqdan istifadə etmişdir.

Prezident seçkilərinin nəticələri, gözlənildiyi kimi, müxalifət düşərgəsində narazılıqla qarşılandı. Səsvermə başa çatdıqdan sonra ölkənin şəhərlərində etiraz nümayişləri keçirilmişdir. Ən kütləvi aksiya paytaxt Minskdə qeydə alınmışdır: məlumata görə, burada etirazçıların sayı beş min nəfərə çatmışdır. Digər şəhərlərdə küçələrə bir neçə yüz nümayişçi çıxmışdı. Hüquq-mühafizə orqanları nümayişçiləri dağıdıb asayişi bərpa etmək üçün hərəkətə keçmiş, xüsusi vasitələrə, o cümlədən rezin güllələrə, təzyiqli suya və səs qumbaralarına əl atmışdır. 3 minə yaxın etirazçı saxlanılmışdır. KİV-in verdiyi xəbərə görə, ölkədə ictimai asayişi üç-dörd saatdan sonra bərpa etmək mümkün olmuşdur.

Bütün bunlara baxmayaraq, müxalifət düşərgəsi seçkilərdə faktiki olaraq qələbə qazandığını iddia etmişdir. Tixanovskaya seçki qərargahında keçirdiyi mətbuat konfransında bildirmişdir ki, seçki kampaniyası imzatoplama mərhələsindən başlayaraq xalqın müxalif qüvvələrə dəstəyini nümayiş etdirmişdir.

Belarusda prezident seçkiləri hansı namizədin qalib gəlməsindən çox Minskin beynəlxalq aləmlə, ilk növbədə Rusiya və Qərb ölkələri ilə münasibətləri qarşıdakı mərhələdə necə quracağı maraq doğurur. Prezident vəzifəsinə iddialı beş namizədin hamısının proqramları bir-birindən az fərqlənirdi. Onların praktiki olaraq hər biri Rusiyaya birtərəfli istiqamətlənməni zəiflətməyə və Qərb tərəfdaşları ilə əlaqələri genişlətməyə tərəfdar çıxırdı. Eyni zamanda bütün namizədlər əsas şüar kimi Belarusun müstəqilliyini müdafiə etmək vədi verirdilər.

İndi seçkiqabağı vədləri reallaşdırmağın vaxtı gəlib çatmışdır. Prezident Lukaşenko dövlət başçısı kimi hər şeydən əvvəl Rusiya ilə münasibətləri yoluna qoymalıdır. Heç kimə sirr deyil ki, xeyli vaxtdır Minsk-Moskva əlaqələrində ciddi problemlər nəzərə çarpır. Doğrudur, Lukaşenko səsvermədən əvvəl bəyan edirdi ki, Belarusda, yaxud Rusiyada hakimiyyətdə kimin olmasından asılı olmayaraq, Moskva həmişə Minskin ən yaxın müttəfiqi olacaq. Bununla yanaşı, o qeyd edirdi ki, Rusiya qardaşlıq münasibətlərini tərəfdaşlıq münasibətləri ilə əvəzləmişdir. İndi iki ölkə arasında tərəfdaşlığın özünü də qurmaq lazımdır.

Məlum olduğu kimi, iki ölkə uzun illərdir ittifaq dövləti təşəbbüsü çərçivəsində sıx əməkdaşlıq edirdi. Rusiya Belarusun əsas kreditoru idi. Minsk Moskvadan böyük məbləğdə kredit almaqda, enerji daşıyıcıları idxalında güzəştlərdən istifadə edirdi. Rusiya keçən ilədək Belarusun yeganə neft təchizatçısı idi. Bu il isə vəziyyət dəyişmişdir. Minsk və Moskva Rusiyadan Belarusa ixrac edilən neftin qiymətini razılaşdıra bilməmişdir. Nəticədə Belarus Şərq qonşusundan neft idxalını azaltmağı qərara almış, karbohidrogen idxalı mənbələrini şaxələndirmək xətti götürmüşdür. İndi Belarus Rusiyadan əlavə, bir sıra digər neft ölkələrindən "qara qızıl” idxal etməyə başlamışdır.

Səsvermə ərəfəsində Belarus-Rusiya münasibətlərində daha bir qalmaqal yarandı. Ötən ayın 29-da Belarusda Rusiyanın "Vaqnerin özəl hərbi şirkəti”nin 33 üzvü həbs olunmuşdur. Prezident Lukaşenko "Vaqner”çi muzdluların səsvermə ərəfəsində Belarusda sabitliyi pozmaq cəhdində olduğunu bəyan etmişdir. Hər iki tərəfin bir-birinə zidd çoxsaylı bəyanatlarına baxmayaraq, rusiyalılar hələ də həbsdədirlər və onların taleyinə aydınlıq gətirilməmişdir.

Belarus rəhbərliyi dost ölkələr coğrafiyasını genişləndirməyi planlaşdırır. Söhbət ilk növbədə Avropa İttifaqı ölkələrindən gedir. Prezident Lukaşenko hesab edir ki, Belarus sakinləri son 25 il ərzində "həm Şərqə, həm də Qərbə pəncərələri olan ümumi bir ev” qurmuşlar. Aydındır ki, Minskin Avropaya yaxınlaşmaq istiqamətdə səylərinin real nəticə verməsi üçün xeyli vaxt lazım gələcək, çünki Brüssel Belarusla əməkdaşlığı inkişaf etdirmək üçün hər şeydən əvvəl tərəfdaşından Avropa demokratiya standartlarına uyğunlaşmağı tələb edir.

Allahverdi MEHDİYEV,

"Azərbaycan”

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

DİQQƏT ÇƏKƏNLƏR

ÇOX OXUNANLAR

OXUCU MƏKTUBLARI

NƏŞRLƏRİMİZ

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

TƏQVİM / ARXİV

Video