​Dünyanı cənginə almış koronavirus epidemiyası samuxlu fermerləri qətiyyən qorxutmur. Onlar Nazirlər Kabineti yanında Operativ Qərargahın verdiyi qərarlara əməl etməklə hər gün əkin sahələrinə çıxır, bu il daha çox taxıl yetişdirmək uğrunda əzmlə mübarizə aparırlar.

Samux Rayon Aqrar İnkişaf Mərkəzinin direktoru Rahil Həsənovun verdiyi məlumata görə keçən il qazanılan uğurlar rayon taxılçılarını daha böyük uğurlara ruhlandırmışdır. Qeyd edək ki, 2019-cu ildə 9 min 623 hektarda taxıl yetişdirən fermerlər bu sahələrdən19 min 343 ton buğda, 12 min 699 ton isə arpa istehsal etdilər. Hər hektardan da məhsuldarlıq yüksək oldu. Belə ki, arpa sahələrinin hər hektarından 34,5 sentner, buğda sahələrindən isə 32,6 sentner məhsul götürüldü.

​Öyrəndik ki, keçən ilki uğurlardan ruhlanan rayon taxılçıları cari ilin məhsulu üçün əkin sahələrini bir qədər də genişləndirərək 10 min 604 hektara çatdırmışlar. Onun 6min 62 hektarını buğda, 3 min365 hektarını isə arpa təşkil edir. Keçən ildən fərqli olaraq bu il xəsil sahələri də genişləndirilərək 777 hektara çatdırılmışdır.

​Fermerlər səpilmiş taxıla aqrotexniki qaydalarda qulluq etməklə indidən bol məhsulun bünövrəsini qoyurlar. Artıq sahələrə birinci vegetasiya suyunun verilməsi başa çatdırılmışdır. İkinci vegetasiya suyunun verilməsi isə 3 min hektarda uğurla həyata keçirilmişdir. Hazırdafermerlər sahələrdə ziyanvericilərə və gəmiricilərə qarşı mübarizə aparmaqla yanaşı, yemləmə gübrəsinin verilməsini də həyata keçirirlər.

​Rayonda ən çox taxıl əkən "Aqro DAİRY” MMC, "Regionaqro” MMCvə "Murovdağ” kəndli fermer təsərrüfatı bu il də daha çox taxıl istehsal etmək üçün bütün qüvvələri səfərbərliyə almışlar.