Bələdiyyə seçkilərinə sayılı günlər qalır. Seçkilərin yüksək səviyyədə keçməsi üçün Sumqayıt şəhərində də hazırlıq işləri başa çatıb. Müşahidəçilərin səsvermənin gedişini izləmələri üçün lazımi şərait yaradılıb.

43 saylı üçüncü Sumqayıt dairə seçki komissiyasının (DSK) sədri Həsən Məmmədovla söhbətimiz də bu barədə oldu. O dedi ki, seçkilər hər bir dövrdə xalqın gələcək inkişaf yolunu müəyyənləşdirən mühüm siyasi prosesdir. Bu prosesdə xalq həmişə layiqli namizədə etimad göstərib. İnanırıq ki, bu seçkidə də belə olacaq. Bizim seçki dairəsində 34 daimi seçki məntəqəsi fəaliyyət göstərir.

Dairədə ilk dəfə 225 gənc səs verəcək. Onların çoxu ali məktəb tələbəsidir. Maraqlıdır ki, əksəriyyət vaxt tapan kimi dairə seçki komissiyasına gəlir və seçkilərin keçirilməsində bizə kömək etmək istədiklərini bildirirlər. Belə gənclərlə fəxr etməyə dəyər.

Yaşlı nəslin nümayəndələrinə gəldikdə onların əksəriyyəti ilə məntəqələrdə görüş keçirilmiş, seçki günü səsvermələri üçün xüsusi marşrutlar müəyyənləşdirilmişdir.

Daha sonra komissiya sədri qeyd etdi ki, bütün məntəqələr telefonlaşdırılıb, müasir texniki avadanlıqlarla təmin edilib. Seçki günü məntəqələrin fasiləsiz elektrik enerjisi ilə təmin olunmaları üçün müvafiq tədbirlər görülüb.

Namizədlərin təbliğat-təşviqat materiallarının yerləşdirilməsi üçün lövhələr quraşdırılıb. 19 bələdiyyə üzvü seçilməlidir. Namizədlərin sayı isə 75 nəfərdir. Onların hamısına eyni şərait yaradılıb.

DSK-nın sədri vurğuladı ki, bütün seçki məntəqələri üzrə treninqlər keçirilib. Maarifləndirmə işləri yerinə yetirilib, məntəqələrə təlimatlar, yaddaş kitabçaları paylanılıb.

DSK üzrə müşahidəçilərin sayı 205 nəfərdir. Qeyri-hökumət təşkilatlarının, YAP, BAXCP və digər partiyaların müşahidəçiləri artıq qeydiyyatdan keçib. Onların arasında öz təşəbbüsü ilə qeydə alınanlar da var. Seçki gününədək müşahidəçilərin sayının artacağı gözlənilir.

43 saylı Sumqayıt üçüncü seçki dairəsinin 13 saylı seçki məntəqəsində də olduq. Burada da hazırlıq işləri başa çatmaq üzrə idi. Məntəqə seçki komissiyasının sədri Tahirə Səfərova bildirdi ki, məntəqədə 1365 nəfər səs verməlidir. Məntəqə seçki qanunlarına uyğun ləvazimatlarla təmin edilib.

Akif ƏLİYEV,

"Azərbaycan”