ABŞ Prezidenti Donald Tramp dövlət başçısı seçkilərinə bir il qalmış populyarlığa görə Demokratlar Partiyasının beş təmsilçisindən geri qalır. Buna "Langer Research Assotiates” şirkətinin "ABC News” telekanalı və "Washington Post” qəzeti üçün keçirdiyi sorğunun nəticələri dəlalət edir.

Əgər prezident seçkiləri bu gün keçirilsəydi və Trampın rəqibi demokrat Co Bayden olsaydı, Ağ evin başçısına qeydiyyatdan keçmiş seçicilərin 39 faizi, onun rəqibinə isə 56 faizi səs verərdi. Vermont ştatından senator Berni Sanderslə analoji qarşıdurmada hazırkı Prezident 14 faiz geriləmə ilə məğlub olardı. Massaçusets ştatından senator Elizabet Uorren Trampı 15 faiz üstələyərdi. Amerika lideri Saut-Bend şəhərinin meri Pit Butticiçə 11 faiz, Kaliforniya ştatından senator Kamala Harrisə isə 9 faiz fərqlə uduzardı.

Həddi-büluğa çatmış 1003 amerikalının iştirak etdiyi sorğu ötən ayın 27-dən 30-dək telefonla keçirilmişdir. Statistik xəta 3,5 faiz təşkil edir.

ABŞ-da növbəti prezident seçkiləri gələn il noyabrın 3-də keçiriləcək. Hazırkı dövlət başçısı, respublikaçı Donald Tramp seçkilərə qatılmaq niyyətində olduğunu artıq elan etmişdir.

Demokratlar Partiyasından namizədlərin ilkin seçkiləri (praymeriz) fevraldan iyunadək keçiriləcək. Bundan sonra partiya qurultayında qalib seçiləcək. Məhz o, Trampın rəqibi olacaq.

Sorğuların əksəriyyətində Co Bayden birinci, Elizabet Uorren və Berni Sanders ikinci və üçüncü yerləri tuturlar.