Mənəvi Dəyərlərin Təbliği Fondu tərəfindən milli-mənəvi dəyərlərimizin qorunması və təbliği, eləcə də dini etiqad sahəsində maarifləndirmə işi bir neçə istiqamətdə həyata keçirilir ki, bunlardan da başlıcası müxtəlif mövzularda kitabların nəşrinə, sosial videoçarxların və sənədli filmlərin hazırlanmasına maddi vəsaitin ayrılmasıdır.

Belə ki, 2018-ci il ərzində fondun dəstəyi ilə 51 müxtəlif adda kitab nəşr edilmiş, 3 sənədli film, 5 sosial videoçarx hazırlanmışdır. 2019-cu il üçün isə 43 adda kitabın nəşri, 6 sənədli film və 6 sosial videoçarxın hazırlanması nəzərdə tutulmuşdur.

Mənəvi Dəyərlərin Təbliği fondunun dəstəyi ilə nəşr edilən kitablar, hazırlanan sosial videoçarxlar və filmlər milli-mənəvi, əxlaqi, tərbiyəvi, sosioloji, dini, tarixi, vətənpərvərlik və s. bu kimi əhəmiyyətli mövzuları əhatə edir. Burada əsas məqsəd hər birimiz üçün müqəddəs sayılan, cəmiyyətin inkişafında xüsusi rolu olan ailə dəyərlərinin, dini və əxlaqi dəyərlərin, vətənpərvərliyin, böyüyə hörmət və kiçiyə mərhəmətin, yaxşılığın, yardımlaşmanın, xeyriyyəçiliyin, birgəyaşayışın, azərbaycançılığın təbliğinə töhfə vermək və bu istiqamətdə maarifçilik işini həyata keçirməkdir. Fondun dəstəyi ilə hazırlanan nəşrlərdə intihar, zərərli vərdişlərə aludəçilik, mənəviyyat böhranı, dini radikalizm və s. qlobal problemlərə toxunulur və səbəbləri araşdırılır.

"Azərbaycanda xeyriyyəçilik ənənələri”, "İslam: mənəvi dünyadan sosial həyata”, "Erməni terroru: Azərbaycanın dini və tarixi abidələri”, "Azərbaycanda ailə dəyərləri”, "Mənəvi dəyərlər

İlham Əliyev siyasətinin tərkib hissəsi kimi”, "Birgəyaşayış fəlsəfəsi özünütəcriddən vəhdətə doğru”, "Qurani-Kərimdə mənəvi prinsiplər” adlı kitablar fondun dəstəyi ilə nəşr edilənlərin kiçik bir hissəsidir.

Həmçinin Mənəvi Dəyərlərin Təbliği Fondunun sifarişi ilə "Ailə dəyərləri”, "Heydər Əliyev və azərbaycançılıq”, "Oxu” filmləri, "Həyat dəyərlidir”, "Azərbaycan bayrağı”, "Dilim varsa, mən varam”, "Azərbaycan ailəsi”, dahi xeyriyyəçimiz Hacı Zeynalabdin Tağıyevə həsr olunmuş "Xeyriyyəçilik ənənələrimiz” adlı videoçarxlar hazırlanaraq sosial şəbəkələrin fonda məxsus olan səhifələrində nümayiş etdirilmişdir.

Qeyd edək ki, fondun maarifləndirmə sahəsində fəaliyyətinin bir hissəsini də müxtəlif mövzularda konfransların, seminarların, "dəyirmi masa”ların keçirilməsi təşkil edir. Belə ki, ötən ildən bugünədək ölkənin müxtəlif bölgələrində 100-ə yaxın konfrans, seminar və "dəyirmi masa”lar təşkil edilmişdir. Bu tədbirlərdə mövzuya uyğun olaraq ekspertlərin mühazirələri dinlənilir, fondun sifarişi ilə hazırlanmış filmlər və videoçarxlar nümayiş olunur, həmçinin disk halına salınaraq kitablarla birlikdə pulsuz paylanılır.

Xəyalə MURADLI,

"Azərbaycan”