ABŞ-ın 13 ştatı Ağ evin elan etdiyi yeni immiqrasiya qaydalarının qüvvəyə minməsinin qarşısını almaq məqsədilə Prezident Donald Trampın administrasiyasına qarşı məhkəmədə iddia qaldırmışdır. "Röyter” agentliyinin xəbərinə görə, ştatlar administrasiyanın azgəlirli şəxslərə viza və vətəndaşlıq verilməsini məhdudlaşdıran qərarına etiraz edirlər.

İddianı Vaşinqton, Virciniya, Delaver, Kolorado, İllinoys, Massaçusets, Minnesota, Miçiqan, Merilend, Nevada, Nyu-Cersi, Nyu-Meksiko və Rod-Aylend ştatları vermişdir. Vaşinqtonun baş prokurou Robert Ferqüson bildirmişdir ki, Tramp administrasiyanın belə bir qərarı amerikalı olmaq istəyən bir çox adamların arzularını puç edə bilər. Onun dediyinə görə, qərar artıq ABŞ-da yaşayanlara ziyan vurar, onları ev-eşiksiz və tibbi yardımsız qoyar. Baş prokuror əlavə etmişdir ki, "Tramp administrasiyasının ideyası aydındır: varlısınızsa, xoş gəlmisiniz, yoxsulsunuzsa, yox”.

İddianı Vaşinqton qubernatoru Cey İnsli də dəstəkləmişdir. O qeyd etmişdir ki, "Vaşinqton həmişə immiqrantların yanında olacaq, Tramp administrasiyasının hər hansı hərəkəti nə işlə, nə də sözlə bunu dəyişdirə bilməz”.

Trampın köməkçisi Stiven Millerin təklif etdiyi qaydalar ABŞ-a gəlib dövlət yardımı almağa ümid edən adamlara qarşı yönəlmişdir. Ağ ev administrasiyasının fikrincə, ölkənin vətəndaşı olmaq istəyənlərin özləri ayağa qalxa bilərlər. Vətəndaşlığın verilməsi və immiqrasiya məsələləri bürosu rəhbərinin səlahiyyətlərini icra edən Ken Kuççinelli bildirmişdir ki, "insan yoxsuldursa, o, ABŞ-ın tamhüququlu sakini olmağa hazırlaşmalıdır”.

Ağ ev administrasiyasının yeni qərarı oktyabrın 15-də qüvvəyə minməlidir.