21 Iyul 2019 22:11
514
CƏMİYYƏT
A- A+

QMİ-nin Gürcüstan nümayəndəliyi Keşikçidağ məbəd-kompleksi ətrafında yaranmış vəziyyətlə bağlı bəyanat yayıb



Azərbaycan və Gürcüstan xalqları arasında əsrlərboyu tarixi dostluq və qardaşlıq münasibətləri mövcud olub. Əsrlərin sınağından çıxmış qardaşlığımız son günlər baş verən təxribat səbəbindən daha bir imtahandan keçir.

AZƏRTAC xəbər verir ki, bu fikirlər Qafqaz Müsəlmanlar İdarəsinin (QMİ) Gürcüstandakı səlahiyyətli nümayəndəsi Hacı Əli Əliyevin Keşikçidağ məbəd-kompleksi ətrafında yaranmış vəziyyətlə bağlı bəyanatında yer alıb.

Bəyanatda deyilir: "Mən Gürcüstan vətəndaşı və Gürcüstan azərbaycanlısı olaraq əminliklə deyə bilərəm ki, gürcü və Azərbaycan xalqları, dindarları arasında heç bir nifaq, milli və ya dini qarşıdurma halı yoxdur, ola da bilməz. Bunun üçün əsas yoxdur və xalqlarımız, dövlət, hökumət rəsmilərimiz arasında olan strateji münasibətlər, dini liderlərimizin müdrikliyi, onların dünyaya örnək qardaşlıq əlaqələri buna imkan vermir”.

Vurğulanır kı, Gürcüstanda yaşayan azərbaycanlılar Gürcüstan dövlətinin diqqət və qayğısını hər zaman hiss edirlər. Dindarlarımızın ibadət və mərasimləri üçün hər cür şərait mövcuddur. Dövlət rəsmiləri dini bayramlarımızda bizi təbrik edir, mərasimlərimizdə iştirak edirlər. Gürcüstan vətəndaşları olan azərbaycanlılar Gürcüstan dövlətinin inkişafı üçün əllərindən gələni əsirgəmirlər. Yarım milyonluq azərbaycanlı icması gürcü xalqı ilə birlikdə çiyin-çiyinə Gürcüstan dövlətinin siyasi, iqtisadi, mədəni həyatının bütün sahələrində iştirak edir. Onlar ölkənin ərazi bütövlüyü uğrunda şəhidlər veriblər. Azərbaycanlı müsəlman icmasının bütün məsələlərinə gürcü hökuməti hər zaman həssaslıqla yanaşır, onların müsbət həllinə yardımçı olur.

"QMİ-nin səlahiyyətli nümayəndəsi olaraq Ümumgürcüstan Katolikos-Patriarxı II İlya həzrətləri ilə tez-tez görüşürəm, onun xalqımıza olan xoş münasibətinin şəxsən şahidiyəm. Azərbaycanda yaşayan gürcü xalqının nümayəndələri üçün də hər cür şərait yaradılıb.

Belə bir qarşılıqlı ehtiram və etimad mühiti, görünür, bədxahlarımızın işinə yaramır. Təxribatlara əl atmaqla iki xalqın arasına nifaq toxumu səpmək, qarşıdurma yaratmaq ümidindədirlər. Xəyanətkarlığın ardında duran qüvvələrin ən böyük məqsədi bu qarşıdurmanı təkcə milli deyil, dini müstəviyə daşımaqdır. Bu mənfur, bədxah niyyəti Qafqazda gerçəkləşdirmək cəhdləri məlum qüvvələrin zəhərli təfəkküründə hər zaman mövcud olub. Xüsusilə Ermənistan-Azərbaycan Dağlıq Qarabağ münaqişəsi başlanan zamanlarda bu məsələ erməni ekstremistləri tərəfindən xüsusi canfəşanlıqla, məqsədyönlü şəkildə xristian-müsəlman qarşıdurması kimi qabardılırdı. O zaman Qafqazın dini liderlərinin müdrik mövqeyi, Azərbaycanın dini lideri Şeyxülislam Allahşükür Paşazadə həzrətləri və Gürcü Pravoslav Kilsəsinin rəhbəri Patriarx II İlya həzrətlərinin birgə zəruri addımlar atmaları nəticəsində münaqişəyə dini səciyyə vermək istəyənlərin niyyətinin qarşısı alındı. Lakin təəssüflər olsun ki, maraqlı qüvvələrin Qafqazda bu ssenarinin zaman-zaman yenidən gündəmə gətirmək istəkləri var. Eyni ssenarinin gürcü və Azərbaycan xalqları arasında yaşanmasına imkan verə bilmərik.

Biz ümidvarıq ki, Keşikçidağ məbədi ətrafında yaradılmış süni problem aidiyyəti qurumlar tərəfindən tezliklə həllini tapacaqdır, inşallah. Bu istiqamətdə işlər gedir və öz hüquqi həllini tapacaq. Biz dindarlar bunun üçün Bir Olan Yaradanımıza dualar edir, xalqlarımız və dövlətlərimizin dostluq və qardaşlıq münasibətlərinin bu imtahandan da üzüağ çıxaraq daha da dərinləşməsini diləyirik. Biz, Gürcüstan və Azərbaycanın sağlam düşüncəli qüvvələri, siyasiləri, ictimai və din xadimləri, siravi vətəndaşları yalnız səylərimizi birləşdirməklə bütün problemləri, anlaşılmazlıqları aradan qaldıra bilərik. Kənardan müdaxilə və təxribatlar yolverilməzdir. Ağsaqqallarımız olan dini liderlərimizin birmənalı mövqeyi olduqca mühümdür.

Keşikçidağ məbəd-kompleksi ətrafında yaranmış məsələyə dair ötən aylarda Katolikos-Patriarx II İlyanın müdrik ağsaqqal mövqeyinin, təmkinli, xalqlarımız arasında sülh və qardaşlığın qorunub saxlanılmasını prioritet sayan yanaşmanın şahidi olduq. Bu məsələləri kənardan körükləyənlərə qarşı II İlya həzrətlərinin kəskin mövqeyi və ciddi etirazı özünü gözlətmədi. Bu məsələdə maraqlı olan kənar qüvvələrin rolunu da istisna etməyən patriarxlıq bunun yolverilməz olduğuna dair qətiyyətli mövqe bildirdi.

Eyni zamanda, Qafqaz Müsəlmanlarının dini lideri Şeyxülislam Allahşükür Paşazadə bununla bağlı birmənalı mövqeyini ifadə etdi”.

Dini hissələrdən siyasi məqsədlər üçün sui-istifadə yolverilməzdir və dini qarşıdurma yaratmaq cəhdi ikrah doğuran haldır. Biz, Gürcüstan və Azərbaycan dindarları dövlətlərimizin və dini liderlərimizin mövqeyindən çıxış edərək bu yolda öz səylərimizi əsirgəməyəcək, xalqlarımızı qarşı-qarşıya qoymağa çalışan qüvvələrin təxribatlarına uymayacağıq. Bədxahlarmızın, marağı olan qüvvələrin məkrli niyyətləri tarixi qardaşlıq və ənənəvi Qafqaz müdrikliyi qarşısında puç olacaqdır, inşallah!", - deyə bəyanatda bildirilir.



AZƏRTAC

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

DİQQƏT ÇƏKƏNLƏR

ÇOX OXUNANLAR

OXUCU MƏKTUBLARI

NƏŞRLƏRİMİZ

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

TƏQVİM / ARXİV

Video