Ağcaqayın ağacının şirəsi əsl təbii möcüzədir. Ağacın gövdəsinin daxilində axan bu şirə bir çox faydalı və müalicəvi xüsusiyyətlərlə zəngindir. Hələ qədim Slavyan xalqları bu ağacın şirəsini ölümdən başqa bütün xəstəliklərin çarəsi kimi hesab edirdilər.

Şirənin tərkibində B6, B2 vitaminləri və minerallar, orqanik turşular, büzücü maddələr, fermentlər, fitonsidlər var. Belə zəngin kimyəvi tərkibə görə şirə orqanizmə kompleks şəklində müalicəvi və profilaktik təsir edir. Ağır xəstəlik və ya əməliyyat keçirmiş insana bu şirə xüsusilə faydalıdır - orqanizmin bərpasını sürətləndirir, tonusunu artırır, güc verir.

Tərkibindəki fitonsidlərə görə şirə orqanizmə iltihab əleyhinə təsir edir, immun sistemini möhkəmləndirir.

Ağcaqayın ağacının şirəsi maddələr mübadiləsini sürətləndirir, arıqlamağa kömək edir. Qida dəyəri çox yüksək olan bu şirənin enerji dəyəri olduqca azdır - 100 qr şirədə yalnız 24 kalori var.

Həmçinin şirə sinir sisteminə də müsbət təsir edir, əhvalı yaxşılaşdırır, stress və depressiya ilə mübarizə etməyə kömək edir.

Ağcaqayın ağacının şirəsi böyrəkləri təmizləyir, onların fəaliyyətini yaxşılaşdırır.

Şirə yazın əvvəlində yığılır. Bunun üçün ağacın kök hissəsindən 1 metrdən hündür olmayan gövdəsi çərtilərək rezin və ya kapron borunun bir ucu həmin nahiyəyə, digər ucu axan şirəni yığmaq üçün butulkaya qoyulur. Bir ağacdan 1-2 litr şirə yığmaq olar. Daha çox şirə yığmaq tövsiyə edilmir, çünki ağac məhv ola bilər.