Vaşinqtonda müvəqqəti olaraq fevralın 15-dək dayandırılmış "şatdaun”un bərpa olunacağı ilə bağlı narahatlıq artmaqdadır. Demokratlar və Respublikaçılar partiyaları arasında danışıqlarda iştirak edən respublikaçı senator Riçard Şelbi "Fox News” telekanalına müsahibəsində müzakirələrin hələ ki nəticəsiz qaldığını bildirmişdir. O, demişdir ki, razılaşma əldə ediləcək. Eyni zamanda Şelbi buna əmin olmadığını qeyd etmişdir.

Öz növbəsində Ağ ev aparatının müvəqqəti başçısı Mayk Malvani qeyd etmişdir ki, "şatdaun”u gündəlikdən birdəfəlik çıxarmaq olmaz”. "Prezident həqiqətən inanır ki, biz sərhəddə milli təhlükəsizlik böhranı və humanitar böhranla üzləşmişik və bunların öhdəsindən gəlmək istəyir” deyə məmur vurğulamışdır.

Prezident Donald Tramp isə Twitterdəki mikrobloqunda demokratları Meksika ilə sərhəddə "son dərəcə zəruri divarın tikintisinə çox az pul ayırmaqda” ittiham etmişdir.

Hazırkı "şatdaun” - ABŞ-ın dövlət orqanlarının işinin qismən dayandırılması ötən il dekabrın 22-də başlamış və 35 gün davam etmişdir. Yanvarın 25-də senatorlar və ABŞ Konqresinin Nümayəndələr Palatasının üzvləri fevralın 15-dək "şatdaun”u dayandırmaq barədə razılığa gəlmişdilər.

Tramp Meksika ilə sərhəddə divar inşası üçün büdcədə 5,7 milyard dolların nəzərdə tutulmasını tələb edir. ABŞ Prezidenti bu olmadan büdcə layihəsini dəstəkləməkdən imtina edir. Konqresin Nümayəndələr Palatasında çoxluq təşkil edən demokratlar divarın tikintisi ilə razılaşmırlar.