04:19 07 Mart 2021
ONLINE XƏBƏR LENTİ
00:48 07.03.2021

Qan bahasına yaranan bayram


00:45 07.03.2021

İncə qəlblilər


00:40 07.03.2021

Yel çərşənbəsi


00:40 07.03.2021

Üçüncü çərşənbə


00:40 07.03.2021

Novruzun topları


00:39 07.03.2021

Baharın ilk müjdəçiləri


Zəfər qoxulu payızım...
BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

Xocalı soyqırımı qurbanlarının xatirəsi Pakistanda yad edilib
ANA SƏHİFƏ / SİYASƏT
15:18 23.02.2021

 

Azərbaycanın Pakistandakı səfirliyi, bu ölkənin ixtisaslaşmış beyin mərkəzlərindən olan Münaqişənin Həlli İnstitutu (MHİ) ilə birgə Xocalı soyqırımının 29-cu ildönümünə həsr olunmuş “Bombardmanlar, qətliamlar, soyqırımlar. İnsanlığa qarşı cinayətlər” adlı seminar təşkil edib.

AZƏRTAC xəbər verir ki, seminarda Pakistanın federal naziri, Milli Assambleyada Kəşmir məsələləri üzrə parlament komitəsinin sədri Şəhriyar Afrid, MHİ-nun rəhbəri Sabah Aslam, müdafiə üzrə analitik, ehtiyatda olan general-leytenant Amjad Şoaib, Kayde Azam Universitetinin müdafiə və strateji araşdırmalar üzrə professoru Səlma Malik, Pakistanın bir sıra millət vəkilləri, diplomatlar, gənclər və universitet tələbələri, kütləvi informasiya vasitələrinin və ictimaiyyətin nümayəndələri iştirak ediblər.

Hər iki ölkənin dövlət himnləri səsləndirildikdən, soyqırımı qurbanlarının xatirəsi yad edildikdən və Heydər Əliyev Fondunun dəstəyi ilə Xocalı soyqırımına dair hazırlanan sənədli filmin nümayişindən sonra seminarı giriş sözü ilə açan Sabah Aslam faciənin fəsadları və nəticələri haqqında məlumat verib.

Çıxışına ulu öndər Heydər ƏIiyevin Xocalı ilə bağlı söylədiyi “Xocalı qətliamı erməni şovinist və millətçilərinin tarix boyu azərbaycanlılara qarşı 200 il ərzində törətdiyi soyqırımı və etnik təmizləmə siyasətinin davamıdır” fikri ilə başlayan Azərbaycanın Pakistandakı səfiri Əli Əlizadə Ermənistanın hərbi-siyasi rəhbərliyinin ölkəmizin mülki əhalisinə və günahsız insanlarına qarşı cinayətlərini Vətən müharibəsi dövründə də davam etdirdiyini, bunun vaxtilə törədilmiş Xocalı soyqırımı kimi qətliamların səbəbkarlarının hələ də cəzasız qalmasından qaynaqlandığını bildirib.

İkinci Qarabağ müharibəsində Ermənistan silahlı qüvvələrinin Azərbaycanın münaqişə zonasından uzaqda yerləşən Gəncə, Bərdə, Tərtər kimi şəhərlərinin mülki əhalisini məqsədli şəkildə böyük dağıdıcı gücə malik raket hücumlarına məruz qoymaqla, uşaq və qadınlar da daxil olmaqla, yüzlərlə günahsız insanın qətlə yetirilməsinin müasir dövrümüzün erməni vəhşiliyi və qətliamın nümunəsi olduğunu qeyd edən səfir beynəlxalq ictimaiyyətin müharibə cinayətlərinə qarşı birlik və qətiyyət nümayiş etdirməsinin vacibliyini bildirib.

Ə.Əlizadə Pakistan Milli Assambleyasında, eləcə də Pakistan Senatının və Assambleyanın müxtəlif daimi komitələrində, bu ölkənin Xeybər Paxtuxva əyalətinin Assambleyasında da Xocalı soyqırımının tanınması və Ermənistan tərəfindən Azərbaycan torpaqlarının işğalının sərt şəkildə qınanması ilə bağlı qəbul edilən qətnamələri xatırladaraq, 44 günlük Vətən müharibəsi dövründə də Azərbaycana siyasi və mənəvi dəstək verdiyinə, erməni haqsızlığına qarşı prinsipial mövqe sərgilədiyinə görə Pakistan dövlətinə və xalqına təşəkkür edib. Diplomat tezliklə Kəşmirdə də sülhün bərqərar olacağına ümid etdiyini, BMT Təhlükəsizlik Şurasının bu bölgə ilə bağlı qətnamələrinin də icrasının vacibliyini bildirib.

Şəhriyar Afridi bu il Xocalı soyqırımının 29-cu ildönümününün qeyd edildiyini vurğulayaraq, orada ermənilər tərəfindən mülki əhaliyə qarşı törədilən qətliamın bəşəriyyətə qarşı cinayət olduğunu diqqətə çatdırıb. Federal nazir Xocalıda, Kəşmirdə, eləcə də dünyada insanlığa qarşı törədilən cinayətləri pisləyib, müsəlman ölkələrinin lehinə olan BMT qətnamələrinə əməl edilmədiyini diqqətə çatdıraraq beynəlxalq təşkilatların bir çox məsələlərə ikili standartlardan yanaşdığını təəssüf hissi ilə ifadə edib.

Amjad Şoaib və Səlma Malik də Xocalı soyqırımının tarixindən, ermənilər tərəfindən günahsız mülki əhalinin vəhşicəsinə qətlə yetirilməsindən söhbət açaraq, insanlığa qarşı törədilən bu cinayətləri şiddətlə qınayıblar. Çıxışçılar bəşəriyyətin Xocalıda və digər yerlərdə törədilən soyqırımlara səssiz qalmamasının vacibliyi, insanların sülh və əmin-amanlıq şəraitində yaşamaları üçün bütün dünya ölkələri və beynəlxalq təşkilatların qətliamı törədənlərin məsuliyyətə cəlb edilməsinin zəruri olduğunu bildiriblər.

Tədbirdə, həmçinin Xocalıda ermənilərin törətdiyi vəhşəti əks etdirən fotostendlər sərgilənib, artıq keçmişdə qalmış Ermənistan-Azərbaycan Dağlıq Qarabağ münaqişəsinə, eləcə də Azərbaycan həqiqətlərinə dair əyani materiallar iştirakçılar arasında paylanıb.

Seminar Pakistanın aparıcı televiziyaları və digər kütləvi informasiya vasitələri tərəfindən geniş işıqlandırılıb.



NƏŞRLƏRİMİZ
Reklam
Reklam


HAVA PROQNOZU
VALYUTA
InvestAZ
ARXİV
TƏQVİM