03 Mart 2021 00:43
917
CƏMİYYƏT
A- A+

Şəhidin cənnətdəki ilk doğum günü

 

Azərbaycanın Vətən müharibəsində parlaq qələbə qazanmasında, torpaqlarımızın işğaldan azad olunmasında, işğalçı düşmənin torpaqlarımızdan qovulmasında qəhrəmancasına şəhid olan igid oğullarımızdan biri də Tovuzun Aşağı Öysüzlü kənd sakini Fikrət Akif oğlu Zeynallıdır. Yaşasaydı 26 yaşı olacaqdı. Amma Fikrət şəhidliyi ilə Vətən göylərinə ucaldı və bu ucalıqla tovuzlulara şərəf gətirdi.       

Fikrət Zeynallı 1995-ci ildə dünyaya göz açmışdı. Atası riyaziyyatçı olduğundan ona bu elmin sirlərini mükəmməl öyrətmişdi. Yəqin ki, bu səbəbdən Fikrətin hələ uşaqlıqdan arzusu riyaziyyatçı olmaq idi. Hətta dəfələrlə riyaziyyat olimpiadalarında birinci yerə çıxmışdı. Bu istedadı onu 2012-ci ildə Bakı Dövlət Universitetinin Fizika fakültəsinə gətirdi. Müəllim olmaq, şagirdlərə elm, təhsil vermək istəyirdi. Təhsil illərində də nümunə göstərən Fikrət nəinki fakültədə, eləcə də universitetdə öz fəallığı ilə seçilirdi. Dərs əlaçısı olmaqla yanaşı, ictimai işlərdə də nümunə göstərən Fikrət 2016-cı ildə ali təhsilini başa vurub həqiqi hərbi xidmətə yollandı.

2020-ci ilin sentyabr ayında erməni silahlı qüvvələrinin torpaqlarımıza hücum edərək yenidən təxribata əl atması Fikrətə də rahatlıq vermədi. O, ərizə ilə müraciət edərək könüllü olaraq təlim məşq toplanışına qatıldı. Bir müddətdən sonra Qarabağ uğrunda gedən döyüşlərə qatıldı. Füzuli, Xocavənd uğrunda gedən döyüşlərdə şücaət göstərdi. Döyüş yoldaşlarının dediklərinə görə, Fikrət ölümdən qətiyyən qorxmurdu. Yeri gələndə yoldaşlarına söyləyirdi ki, insan vətənsiz heç kimdir. “Bizim vətənimizin isə bir qismi düşmən əlindədir. Əgər onu geri ala bilməsək, bu torpağın üstündə gəzmək bizə haram olar”. Elə sonuncu dəfə atası ilə telefonla danışanda da sözünü həmin kəlmələrlə bitirmişdi.

Fikrətin atası Akif müəllim oğlunun əsl vətənpərvər və doğma yurduna bağlı olmasından ağızdolusu danışır. Deyir ki, birinci dəfə döyüşə girəndə məndən də, anasından da halallıq aldı: “Sonra qardaşı və bacısı ilə danışdı. Onların etimadını doğruldacağını söylədi”.  Anası Qızxanım bacımız da oğlu ilə fəxr etdiyini bildirdi: “Bir neçə dəfə telefonla danışdı. Hər dəfə də deyirdi ki, şəhidlərimizin qanını almamış geri qayıtmayacaq”. 

Noyabrın 9-da Xocavənd istiqamətində gedən döyüş zamanı Fikrət və  döyüşçü yoldaşları mühasirəyə düşürlər. Özünü və dostlarını xilas etmək üçün döyüşə atılan Fikrət şəhid olur. Ölümündən sonra dövlət başçısının sərəncamı ilə o, “Vətən uğrunda” və “Xocavəndin azad olunmasına görə” medalları ilə təltif edilir.

Fevralın 23-də Fikrətin 26 yaşı tamam olurdu. Evdə adına qazan da asmışdılar. Atası otaqlardan birinin qapısını açıb bizi içəri dəvət etdi. Burada Fikrətin uğurlarını əks etdirən şəkillərdən ibarət guşə yaradılmışdı. Akif müəllim bir-bir onları göstərir, fəxrlə oğlunun nailiyyətləri barədə məlumat verirdi. Bizə isə ancaq şəhidin ata-anasına təsəlli vermək qalırdı.  

Allah bütün şəhidlərə rəhmət eləsin!

 

Sabir ƏLİYEV,

“Azərbaycan”

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

DİQQƏT ÇƏKƏNLƏR

ÇOX OXUNANLAR

OXUCU MƏKTUBLARI

NƏŞRLƏRİMİZ

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

TƏQVİM / ARXİV

Video