20 Yanvar 2021 17:56
637
SİYASƏT
A- A+

Avstriya Mətbuat Agentliyi 20 Yanvar faciəsi barədə məqalə yayıb  

 

Avstriya Mətbuat Agentliyinin (APA) saytında Azərbaycan xalqının qan yaddaşında silinməz iz buraxan, müstəqilliyə aparan yolda dönüş nöqtəsi, şərəf və qəhrəmanlıq səhifəsi olan 20 Yanvar hadisələrinə həsr olunmuş məqalə yerləşdirilib.

AZƏRTAC xəbər verir ki, məqalədə Qara Yanvar ərəfəsində cərəyan edən hadisələrə nəzər salınıb. Qeyd edilib ki, hələ 80-ci illərin sonunda erməni millətçiləri Azərbaycana qarşı ərazi iddiaları qaldırmış və yüz minlərlə azərbaycanlını Ermənistan ərazisindən qovmuşdular. Məhz həmin dövrdə Azərbaycan xalqı 70 il tərkibində olduğu sovet imperiyasından ayrılaraq müstəqilliyə can atırdı. Azərbaycanın böyük şəhərlərində insanlar ermənilərin ərazi iddialarına və eyni zamanda, o vaxtkı sovet rəhbərliyinin baş verənlərə göz yummasına etiraz edirdilər. Milli azadlıq hərəkatını beşikdə boğmağa qərar verən sovet hökuməti 1990-cı il yanvarın 19-dan 20-nə keçən gücə Bakıya qoşun yeritdi. Dinc əhaliyə qarşı göndərilən ordu 147 günahsız insanı qətlə yetirdi. Ölənlərin bir hissəsi isə siyasi hadisələrdən kənarda olan şəhər sakinləri idi. Həmin hadisələr zamanı 744 nəfər müxtəlif dərəcəli bədən xəsarəti aldı, 841 nəfər isə həbs edildi.

Sovet rejimi Bakıda dinc əhaliyə qarşı törədilmiş vəhşiliyi hər vəchlə dünya ictimaiyyətindən gizlətməyə çalışsa da, buna müyəssər ola bilmədi. Beynəlxalq mətbuat orqanları və vətəndaş cəmiyyəti təşkilatları bu hadisələrin xalqın iradəsini qırmağa hesablandığını, kollektiv cəza metodu kimi tətbiq olunduğunu, lakin bununla belə sovet sistemini çökdürmə potensialı daşıdığını yazırdılar.

Güc tətbiq etməsinə baxmayaraq, kommunist hökuməti öz məqsədlərinə nail ola bilmədi və Azərbaycan 18 oktyabr 1991-ci ildə dövlət müstəqilliyini elan etdi. Məqalədə diqqətə çatdırılıb ki, müstəqilliyin ilk illəri Azərbaycan üçün olduqca ağır dövr olub, Dağlıq Qarabağa iddialarını aktiv müharibə mərhələsinə keçirən Ermənistan Azərbaycanın 20 faiz torpaqlarını işğal edib. Müharibənin ağır nəticələrinə rəğmən Azərbaycanda ötən dövr ərzində güclü iqtisadiyyata malik müasir dövlət qurulub və hazırda Cənubi Qafqazda ən inkişaf etmiş ölkə olmaqla yanaşı, öz coğrafi mövqeyinə görə bir sıra beynəlxalq nəqliyyat koridorlarının kəsişmə nöqtəsinə çevrilib.

Daha sonra qeyd edilib ki, ATƏT-in Minsk qrupunun həmsədrliyi ilə 30 ilə qədər davam edən danışıqlar heç bir səmərə verməyib və Azərbaycan ərazilərini işğalda saxlayan Ermənistan bu əməlinə görə cəzasız qalmasından daha da ürəklənərək Azərbaycana qarşı təxribatların sayını artırıb. Bu təxribatların nəticəsində ötən ilin sentyabr ayında başlanan 44 günlük müharibə nəticəsində Azərbaycan beynəlxalq hüquqa söykənərək öz ərazilərini işğaldan azad edib və ölkənin ərazi bütövlüyünün bərpasına nail olub.

Məqalənin sonunda qeyd edilib ki, Azərbaycan xalqı Vətənin müstəqilliyi, suverenliyi və ərazi bütövlüyü uğrunda canından keçən bütün övladlarının xatirəsini əziz tutur və onları heç zaman unutmayacaq. Hər il olduğu kimi, bu il də dünyanın hər tərəfində yaşayan azərbaycanlılar 20 Yanvar şəhidlərinin və Vətən uğrunda canından keçən bütün oğul və qızlarının xatirəsini yad edir.

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

DİQQƏT ÇƏKƏNLƏR

ÇOX OXUNANLAR

OXUCU MƏKTUBLARI

NƏŞRLƏRİMİZ

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

TƏQVİM / ARXİV

Video